मुलुंड-ठाण्यादरम्यान विस्तारित स्थानक; दोन महिन्यांत भूमिपूजन
म. टा. विशेष प्रतिनिधी, ठाणे
गेली १० वर्षे चर्चेच्या गुऱ्हाळात अडकलेल्या ठाणे आणि मुलुंडदरम्यान प्रस्तावित असलेल्या एक्स्टेंडेड ठाणे रेल्वे स्थानकाचा मार्ग अखेर मोकळा झाला आहे. येत्या दोन महिन्यांत या नव्या स्थानकाचे भूमिपूजन करण्याचे आश्वासन खुद्द रेल्वेमंत्री सुरेश प्रभू यांनी दिले आहे. मेंटल हॉस्पिटलच्या जागेवरच हे रेल्वे स्थानक उभारले जाणार असून ठाण्याहून मुंबईच्या दिशेने जाणाऱ्या आणि येणाऱ्या सर्व लोकल इथूनच सुटतील. त्यामुळे विद्यमान ठाणे स्थानकावरचा ताण मोठ्या प्रमाणात हलका होणार आहे.
सद्यस्थितीत...
more... रोज साडेसहा लाख प्रवाशी ठाणे स्थानकातून प्रवास करतात. तेथील ताण कमी करण्याच्या दृष्टीने नवीन रेल्वे स्थानकाचा प्रस्ताव पुढे आला. रेल्वेमंत्री सुरेश प्रभूदेखील जानेवारी २०१५ मध्ये ठाण्याला आले होते, त्यावेळी नवीन रेल्वे स्थानकाबाबत त्यांनी अनुकुलता दाखवली होती. त्या पाश्वभूमीवर ठाण्याचे खासदार राजन विचारे, डॉ. श्रीकांत शिंदे, महापौर संजय मोरे, रेल्वे बोर्डाचे अध्यक्ष ए. के. मित्तल आणि पालिका आयुक्त संजीव जयस्वाल यांनी गुरुवारी रात्री प्रभू यांची भेट घेतली. त्यावेळी प्रस्तावित रेल्वे स्थानकाचा तांत्रिक अहवाल रेल्वेच्या अधिकाऱ्यांनी सादर केला. त्यावेळी या स्थानकाचे काम लगेच सुरू करण्याचे निर्देश रेल्वेमंत्र्यांनी अधिकाऱ्यांना दिले. तसेच, या प्रकल्पासाठी आवश्यक असलेल्या प्रशासकीय मंजुऱ्यांचा मार्ग मोकळा व्हावा, यासाठी एका विशेष अधिकाऱ्याची नियुक्ती करण्याचे आदेशही प्रभू यांनी दिले आहेत
ठाणे व मुलुंड दरम्यान नवीन रेल्वे स्थानकाचा आराखडा रेल्वेने केला असून मेंटल हॉस्पिटलच्या जागेचा वापर त्यासाठी होणार आहे. नवीन रेल्वे स्थानक हे ठाणे होम प्लॅटफार्म असून ईस्टर्न एक्स्प्रेस हायवेवर ते एलिव्हेटेड स्वरूपात उभारण्यात येणार आहे. स्थानकासाठी मनोरुग्णालयाची जागा तसेच पालिकेची जागा देण्यात येणार आहे. सध्या ठाणे ते सीएसटी (ठाणे लोकल) या धीम्या मार्गावर १७२ आणि जलद मार्गावर १३ फेऱ्या आहेत. सीएसटीहून ठाण्यापर्यंत येणाऱ्या सर्व लोकल या नव्या स्थानकावर दाखल होतील आणि तिथूनच सुटतील. विद्यमान ठाणे स्थानकासाठी अधिक सरकते जिने, वाढीव तिकीट खिडक्या, पाचव्या व सहाव्या मार्गाच्या कामाला गती, ऐरोली ते डोंबिवली एलिव्हेटेड रेल्वेमार्गाची उभारणी आदी प्रलंबित कामे देखील मार्गी लावण्याचे आश्वासन रेल्वेमंत्र्यांनी दिले.
१५० कोटींचा खर्च
या नव्या स्थानकाच्या उभारणीसाठी साधारणतः १५० कोटी रुपये खर्च अपेक्षित असून त्यासाठी ठाणे मेंटल हॉस्पिटल परिसरातील आरोग्य खात्याच्या ताब्यात असलेल्या ८ हेक्टर जागेची आवश्यकता भासणार आहे. रेल्वे प्रशासन आणि महापालिकेच्या अधिकाऱ्यांनी त्या ठिकाणी सर्वेक्षण केले असून या जागेवर अतिक्रमणे आहेत. त्या २०० कुटुंबांचे पुनर्वसन पालिकने विविध ठिकाणी उभारलेल्या घरांमध्ये करण्याचा ठरावही पालिकेच्या सर्वसाधारण सभेने तयार केला आहे. या आठ हेक्टर जागेवर तिकीट घर, बस टर्मिनल आणि कमर्शिअल प्लाझा उभारण्याची पालिकेची तयारी आहे.